Use Leka Main Iban : Pantun Puji/Peransang.

Pantun mayuh penteba enggau funsyen iya. Di baruh bisi sembilan bengkah penteba pantun. 

(sumber Bup Teks Primari 5. lambar 103)

Pantun ke deka diuse aku iya nya pantun puji tauka pantun peransang ngagai siku indu kalu kitai Iban iya nya Dato Sri Tra Zehnder. 

Utai ke deka diuse aku iya nya keterubah iya leka pantun, elemen munyi ke bisi dalam leka pantun, ukur pemanah sereta pengelebih enggau pengelemi leka pantun ke disadaka. Sebedau aku mantaika leka pantun, dulu aku mantaika video aku nyadaka leka pantun nya. Aku nyadaka leka pantun tu lebuh benung mantaika asil ba dalam kelas lebuh ke ngambi kus subjek jaku Iban ke penudi ba pengawa pelajar Degree Jaku Iban.

Leka Pantun:

Ai…ih uji ngetu enda lama kita nembiak primari lima enda lama sesempa rampang pinang

Laban aku deka nyadaka kita jerita lama Ke jarang didinga kita ngena tiun Leka dindang

Arapka kita deka ningaka aku mantaika jerita tuai ngambika tau nyadika pengingat kitai semampai dikenang

Ai…ih aku deka mai kita neladan Indu Kalu kitai Iban ti udah lesi laya midang

Diberi nama Dato Sri Tra Zehnder keterubah indu kitai bansa nyadi pengari kunsil nengeri megai orang

Iya digela aku Dara Menti pengansak nembiak rebak dudi, meri motivasi jaku peransang

Laban iya balat nangika kitai kena tulak umbak tsunami balat begelumbang

Laban iya mai kitai ngetanka main asal enggau jaku kitai Iban ngambika enda punas kena tempias daya idup orang.

Elemen Munyi.

Senimbal enteli

Munyi patah sebut vokal i [i]

Chunto iya: 

Iya digela aku Dara Menti Pengansak nembiak rebak dudi meri motivasi jaku peransang

Munyi patah sebut vokal a [a’]

Chunto iya:

Uji ngetu enda lama kita nembiak primari lima enda lama sesempa rampang pinang

Munyi enteli ba ujung

•         Genteran 1

•Ai…ih uji ngetu enda lama kita nembiak primari lima enda lama sesempa rampang pinang

•         Laban aku deka nyadaka kita jerita lama Ke jarang didinga kita ngena tiun Leka dindang

•         Arapka kita deka ningaka aku mantaika jerita tuai ngambika tau nyadika pengingat kitai semampai dikenang

•         Genteran 2

•         Ai…ih aku deka mai kita neladan Indu Kalu kitai Iban ti udah lesi laya midang

•         Diberi nama Dato Sri Tra Zehnder keterubah indu kitai bansa nyadi pengari kunsil nengeri megai orang

•         Genteran 3

•         Iya digela aku Dara Menti pengansak nembiak rebak dudi, meri motivasi jaku peransang

•         Laban iya balat nangika kitai kena tulak umbak tsunami balat begelumbang

•         Laban iya mai kitai ngetanka main asal enggau jaku kitai Iban ngambika enda punas kena tempias daya idup orang

Asonasyen bekaling dua

•         Senimbal munyi urup vokal ba dua leka jaku ti berimbai

•   Ngambika tau nyadika pengingat kitai semampai dikenang

Patah sebut bekepit

•  Senimbal munyi patah sebut ba leka jaku ngepit seleka, dua tauka lebih

•         ….iya nyadi pengari kunsil nengeri megai orang

•         Ngambika enda punas kena tempias daya idup orang

Munyi patah sebut bekaling tiga

•         Senimbal munyi patah sebut ba tiga leka jaku ti berimbai

•    Iya digela aku Dara Menti Pengansak nembiak rebak dudi meri motivasi jaku peransang

Asonasyen besendi

•  Senimbal urup munyi urup vokal ba ujung leka jaku lalu ditangkanka munyi urup vokal  ba pun leka jaku ti nangkan iya:

•         Chunto iya:

•         Iya digela aku Dara Menti Pengansak nembiak rebak dudi meri motivasi jaku peransang

 Ukur Pemanah.

Ukur pemanah ari leka pantun tu iya keterubah pemantun muji siku Indu Kalu kitai bansa Iban ti udah mujur iya nya Dato Sri Tra Zehnder indu Iban keterubah nyadi pengari kunsil nengeri

Dato tu siku orang ti udah dulu mujur dalam pengawa lalu udah meda perampa ke dulu nya alai iya pemantun ngasuh nembiak neladan Indu Kalu kitai Iban tu.

Ukur pemanah ke nyata dipadahka iya nya, ngasuh, ngansak nembiak dudi hari enda mudah kena parit dunya luar lalu ngetanka main asal enggai jaku kitai Iban enggaika kena tempias daya idup orang bukai.

 Komen penguat enggau pengelemi

Penguat

— Jalai jerita pantun chukup berurun lalu nyamai disadaka

—  Pantun endang bisi meri jaku puji

—  Reti pantun mega enda kelalu dalam diperetika

—  Ajar enggau ukur pemanah ke dipadah mega ayan sereta nyentuk diperetika orang ti ninga/macha

— Leka jaku ke dikena ba pantun nya nadai mayuh besilup/jaku selama

Pengelemi

—  Leka main kelalu mudah diperetika laban nadai mayuh jaku ti bebungai

—  Semina ba genteran 2 enggau 3 aja ke bisi muji tauka ngenang topik

—  Tuju pantun sekalika muji tauka meransang

— Patut ditambahka sigi tauka dua leka jaku dikena ngenyamaika pemantun ti nyadaka :

          Chunto ba ; Ai…ih remba sa……remba (Genteran 1)

Chunto ba; Ai...ih aku mega deka … (Genteran 2)

Chunto agi ba ; Iya mega digela …. (Genteran 3)

  Dikarang:pengajarjimbun@gmail.com