Model Nisih Penerang sereta pengelebih bekenaka model tu dalam proses ngajar enggau belajar.

Nitihka penemu, Woolfolk, 1998 ba bup Mohd Fuad Sam et. al, 2013, Nisih penerang mai reti aktiviti mental mensia ke bekait enggau chara bakani nerima informasyen, nyimpan lalu mansutka baru informasyen nya lebuh bekenaka iya. Teori nisih penerang tu meri penerang ngagai ngajar enggau belajar ke ngemai empas ke manah lalu ulih meransang pengulih nembiak ba pelajar sida dibandingka enggau chara ngajar “chalk and talk”, lalu tu nitihka penemu Hooper. et al. 2003.  Ba penemu Noriati A. Rashid et al, 2015, model nisih penerang tu chara mensia ngingat sebaka enggau komputer, laban Iya madah sida ke belajar ngena model tu deka baka komputer iya nya baka model input-ouput.

Ba model nisih penerang tu bisi tiga bansa chara ngingat, keterubah iya ngingat ngena chara rawang meda enggau ninga, udahnya ngingat timpuh pandak enggau ngingat timpuh panjai. Ba chara ngingat rawang tu, input keterubah chara ngingat tu iya nya ari rawang meda enggau ninga. Input tu deka tadi deka diberi ngagai ngingat timpuh pandak. Penerang ke selalu diterima diperesa ba tikas ke baruh respons meda iya ke dipilih aja. Ambika chunto lebuh bejaku sambil deriba kerita, kitai ulih bejaku lalu ulih terus deriba kerita lalu enda mindahka penerang  tu ngagai ngingat timpuh pandak. Ba timpuh pandak tu siti chara ngingat ke tekalanya. Informasyen ke diulih deka dirikod lalu disimpan ba untak. Informasyen tauka penerang nya tadi enda lenyau tang pedih dikingatka. Ba penemu sida  Noriati A. Rashid et al, 2015, penerang ke dipindahka ngagai ngingat timpuh pandak tu deka aktif ba timpuh lima belas ngagai dua puluh saat aja. Informasyen tauka penerang deka disimpan enggau lebih lama agi enti kitai selalu ngulang deka ngingat ke penerang nya. Ambika chunto lebuh belajarka jaku Iban di sekula, kitai ke deka bejaku standard patut ngulang belama jaku standard nya tadi ngambika tau mantu kitai ngingat enggau timpuh pandak lalu ulih disimpan enggau lebih lama.

Chara kitai nyimpan penerang tauka informasyen ba ngingat timpuh pandak tu iya nya kita deka ngaitka sesebengkah pekara ke deka ditemu kitai. Ambika chunto, lebuh belajarka jaku nama dalam jaku Iban, kitai mesti nemu kaul iya enggau jaku pengawa, jaku adjektif enggau jaku penempat lalu penerang tu dipindahka ngagai ngingat timpuh panjai. Pia mega, penerang dalam ngingat timpuh pandak tu deka lenyau ba timpuh dua puluh saat enti enda diulang belama. Nya ke buah tiap iti penerang mesti diulang belama awakka iya ulih dkingat ngagai chara ngingat timpuh panjai tauka disimpan awakka ulih dipansutka maya deka bekenaka penerang tauka informasyen nya lebuh bekaitka siti-siti penelaba kitai.

Lalu ngingat timpuh panjai tu nengah peneleba siku-siku kitai ke bisi disimpan dikena ngaitka enggau penelaba ke baru awakka ulih ngemudahka chara kitai belajar ti baru nyadi ba pengingat kitai. Bisi dua bansa pengingat iya nya Explisit enggau Implisit. Explisit tu pengingat ke dipansutka sechara sedar lalu Implisit tu nengah chara ke enda sedar.

Ba ngingat timpuh panjai tu bisi bansa ke ngingat chara berengat peneleba tauka utai ke jaka nyadi ti bekait rapat enggau timpuh, haribulan enggau endur. Udah nya, ngingat semantik chara ngingat peneleba diri empu tauka utai ke kala nyadi ti bekaul enggau awak, haribulan enggau endur. Lalu ketiga iya nya, chara ngingat sebut tunda iya siti chara dikena nyimpan informasyen tauka penerang dalam tukuh mata(mental) lalu dipansutka baru lalu enda penerang nya enda diubah lalu baka selama. Udahnya, ngingat chara logik siti chara nerima penerang ti rasional lalu logik. Kepenudi iya, ngingat chara intelektual(penemu) ti bekait rapat enggau idea(tuduh penemu) konsep enggau penerang tauka informsyen ti abstrak. Ba ngingat timpuh panjai tu kitai deka nyimpan penerang tauka informasyen enggau teguh. Ambika chunto iya lebuh kitai deka ngingatka siti-siti topik maya nyaut Tanya peresa, dia kitai lalu ngingat nama informasyen tauka penerang ke ditemu kitai tauka ke bisi lalu udah disimpan kitai dalam ngingat timpuh panjai tu tadi.

Pengelebih bekenaka model nisih penerang tu ba pengawa ngajar enggau belajar iya nya pengajar ulih ngena model tu nerangka konsep, ukum prinsip tauka teori ke patut. Ba dalam ngajar jaku Iban ambika chunto kitai pengajar deka nerangka konsep jaku ganti nama orang pengempu dia kitai deka nerangka konsep tu ngena model nisih penerang tu ngambika nembiak nemu agi. Pia mega kitai pengajar ke deka nerangka konsep ngena keraban bantu belajar baka kereban ICT, gambar, Kad gambar enggau mayuh agi. Kebuah pia ngambika pengawa nerangka siti-siti penerang tadi deka datai lalu nembiak ulih ngingatka nama konsep ke utai deka dipelajarka sida.

Selalu iya pengajar ke ngena model tu deka nerangka prinsip tauka teori ari ke mudah ngagai ke kompleks (tusah). Lebuh belajarka konsep tu chara ngajar iya nya betukuh lalu bepusatka nembiak. Ba ditu pengajar ulih nerangka enggau lenak agi konsep siti-siti utai ke deka dipelajarka nya enggau ngena chara lisan sambil nulis fakta-fakta ti begun aba papan tulis tauka ba dini-dini. Pemanah bekenaka model tu mega ulih ngatur masa pengajar ngajar enggau manah. Lebuh pengajar nerangka fakta tauka informasyen ke beguna maya ngajar iya deka nyadi berurun lalu enda begelih utai ke diajar. Pia mega, nembiak deka nerima lalu ngenukuhka agi konsep ke udah dipelajarka enggau manah.

Tanggung pengawa pengajar mega deka meri respons ngagai idea tauka tuduh penemu nembiak lalu nyukung sida maya sida ngambi ulih ba siti-siti bidang penemu. Pia mega, model tu amat manah dikena ngajar konsep enggau pengelandik ba siti-siti pelajar ba tikas pengerembai nembiak. Pia mega, model tu ngasuh nembiak ngaga diskriminasyen enggau generalisasyen ke engkeman. Nambahka nya mega, model tu ulih nikika agi seregah nembiak ba pengulih sida deka nyapai siti-siti juluk. Model tu mega nekanka pengawa kerja beraban lalu kerjasama maya dalam belajar. Belajar baka tu bekenaka pengelandik baka ngaga bida ba siti-siti bidang pelajar.

Ke simpul iya, model tu amat manah ke maya pengajar ngajar lalu manah mega ke nembiak belajar tauka ngingat siti-siti utai dipelajarka. Model tu tau ngasuh nembiak bepenau dalam begagaka peresa sekalika nya sumatif tauka formatif. Kebuah pia, laban nembiak agi ingatka penerang tauka informasyen ke udah ditemu tauka ke udah dipelajar sida enggau meruan. Bala pengajar patut nemu bekenaka model tu dikena narak bala nembiak awakka lebih mujur ba dalam bidang pelajar.