Ensera Kumang dikarang Jimmy Donald.

by: pengajarjimbun@gmail.com

Kosmologi ba garfik 1 madahka asal penatai, proses enggau struktur rampa menua tauka singka miga. Kosmos tu mai reti perampa dunya. Nyadi Ensera ke deka dipansik aku iya nya Ensera Kumang ari Gelong Batu Nakong Nyinggit Nyinggung Nyandar Nerabang ti dikarang Jimmy anak Donald ba taun 2004. Kosmos ba Ensera Kumang tu iya ba kosmos baruh langit iya dunya sida Kumang enggau sida Keling ti diau ba Panggau Libau. Chara idup enggau perampa pendiau ba kosmos dalam ensera Kumang tu enda jauh bida enggau ba dunya nyata semina orang ti nguan kosmos Gelong enggau Panggau Libau tu bisi ngembuan kuasa ajih sekalika tau bebali, tau kering sereta kebal. Sida mega ngembuan pengaruh. Utai ke sama enggau mensia di menua nyata baka orang ba kosmos tu ulih mati lalu sida patut nengah sebayan iya nya dunya baruh tanah dulu, sida mega bumai, sereta begagaka pengawa baka nenun, nginti, betupika jelu tupi sebaka enggau mensia ti idup ba dunya nyata. Semina ke enda sama laban kitai mensia ba dunya nyata enti udah mati kitai enda ulih pulai agi tang sida di menua Panggau Libau enggau gelong sida ulilh idup baru. Nya alai di baruh tu bejuraika pasal Ensera Kumang tu enggau lenak agi.

Kedut Cherita

Ensera tu bepeun ari sida Kumang di Menua Gelong Batu Nakong Nyinggit Nyinggung Nyandar Nerabang ti baum  berandau deka Besulu. Dia Kumang lalu ngagauka Lulong ngemai iya nugungka bala sida ke indu ke diau ba menua Gelong begempuru ba ruai besulu. Keterubah besulu semua orang ke datai ngemai sulu lalu berengkah bemain tang enggau Kumang seduai Lulong enggai nyadi bemunyi laban sulu seduai iya udah jai. Laban ke sulu dia Kumang seduai Lulong deka minjau sulu sida Keling enggau Laja di Menua Panggau Libau. Keliang Seduai Laja setuju dipinjau Kumang seduai Lulong sulu. Udah ke bisi sulu sida Kumang enggau Lulong ba menua Gelong berengkah besulu sepengelama empat hari. Lebuh ke besulu munyi sida ke besulu didinga semua orang nyentukka sida di Panggau Libau, sida Ini Andan enggau Aki Ungkok. Laban ke deka ninga orang besulu di Gelong enggau dampih agi dia Sempurai enggai Sempungga deka ke menu Gelong deka ngabas orang kin tang nasib enda manah laban seduai ditanya pentik ke nyaga tanggau rumah sida Kumang di gelong ngujungka seduai iya lari teterap tetingkap nyau tekelusu pala patung. Meda bakanya dia dih Sempungga enggau Sempurai lalu madah ngagai bala di Panggau Libau dia Keling enggau Laja lalu ngasuh Chit Apai Jebua enchuri sulu ke dipinjau Kumang seduai Lulong di Gelong. Lebuh ke deka besulu maya hari keempat dia Kumang seduai Lulong meda peti besi endur seduai naruh sulu udah dikerit chit. Seduai lalu nyabak. Dia seduai lalu ngasuh Aki Ngelai enggau Tutong ke Panggau Libau betanya ngagai Keling seduai Laja bakani mayar sulu ke udah lenyau nya. Keling seduai Laja madahka mesti dibayar ngena benda pama ti tau ketawa lekik-lekik enggau benda ular ti tau ngelantar sebelah bilik. Laban ke lama nganti Kumang seduai Lulong empai ulih mayar dia Keling ngemai bala sida Laja enggau orang bukai di Panggau Libau deka ngayau ngagai menua Gelong. Kumang enggau Lulong lalu madahka Keling seduai laja deka bejalai ngiga utai ke dikena mayar sulu ke duah lenyau. Seduai iya bejalai nujah jalai sida keling ke nurun ngayau dia seduai lalu niki pun kayu ti tinggi lalu nikauka tabu ubung lalu nyadika tangga. Seduai iya lalu betemu enggau ini manang. Ini manang meri seduai iya utai ke dikena mayar sulu ke udah lenyau dipinjau seduai iya. Sida Keling enda nyadi munuh Kumang seduai Lulong, sida lalu pulai ke Panggau Libau. Udah nya, Keling lalu ngemai orang baum beruding. Maya ke beruding semua orang di Panggau Libau begempuru beentunka ruding diri empu. Laban ke deka ninga enggau dampih dia dih Indai Mendong enggau Dara Gerigitik mansang tang seduai ditanya pentik ngujungka seduai lari. Lebuh Keling enggau Laja deka ngentun Ruding seduai iya telabuh enggai nyadi. Seduai deka minjau enggau Kumang seduai Lulong di Menua Gelong. Lebuh ke dipinjau Kumang seduai Lulong lalu ngasuh Chit Apai Jebua enchuru ruding ke dipinjau. Lebuh dani Keling enggau Laja meda ruding dalam peti besi udah lenyau. Seduai lalu ngasuh Sempurai enggau Sempungga ngagai Gelong nanyaka bakani deka mayar ruding ke udah lenyau. Kumang enggau Lulong madahka deka ke benda bayan ti bekaban ngikik lalu enggau Lulong benda kenyalang ti ngenggang tau neraik. Sida Gelong madahka deka ngayau enti enda malas utai nya enggau jampat. Dia Keling seduai Laja lalu bejalai begigaka utai kena mayar utai ke udah lenyau nya. Seduai mega minta tulong Inee Rabong hari. Udah bulih seduai pulai ke Panggau lalu meri benda ke dipinta tadi ngagai Kumang enggau Lulong.

Ba tusun kedua, Keling tusah ati ka Bunga Riman. Iya nyau merampau, enggai makai sereta lemi tulang. Bisi sekali iya dibai orang nyumpit ngiga jelu di menua Gelong laban menua nya mayuh jelu. Lebuh ti nyumpit Keling nadai tetemuka siku jelu iya lalu tesat. Kumang ke meda keling lalu mali diri nyadi tupai. Keling nguji nyumpit tupai nya tang enda ga ulih. Keling nyau tesat ke kampung dalam laban nitihka tupai nya. Perut iya lapar lalu iya berasai lelak. Kumang kasih meda Keling iya lalu nganjung bemacham buah ditugungka iya ba nisi Keling ti tinduk. Dani Keling pagi iya lalu maki buah nya laban lapar. Iya lalu nitihka bekal kaki orang ke meri iya buah nya. Tang enda mukai-mukai iya betemu enggau bala antu lalu sida berekak. Antu alah lalu meri Keling pengaruh dinding bulu. Bala antu madah siku indu bisi mansa jalai sida nya. Keling lalu nguji ngayap Kumang. Seduai berandau sampai pagi. Maya pagi Keling nguji diri deka mupuk tang Kumang nyabak minta bai. Keling empai deka mai iya. Sebedau Keling mupuk dia dih menyadi Bunga Riman ngemai iya belaban bepatis enggau bibat lengan. Madi Bunga Riman alah, sebedau mupuk Kumang mekalka Keling berau enggau garam tujuh leka. Udah nya Keling lalu mupuk, iya lalu ngetu ba rumah Ini Manang Eempelai. Iya diau dia sepengalam tuhuh hari. Lebuh ke deka mupuk dia Ini Manang lalu nyepuhka tubuh Keling ngena ai pengaruh lalu meri iya baju jai ri nyadi kebal Keling. Lebuh ngena nya Keling jai gamal tang agi bejaku munyi Keling. Keling ngaga diri mati laban iya bisi meda tambai ulit ba pendai sida di Panggau. Orang Panggau madah Keling udah mati. Laban Keling ke udah mali diri nyadi jai gamal dia orang enda ngelala iya. Bala sida Laja berandauka deka ngetas ulit Keling. Keling enda mati iya ditemu bebali nyadi keling lebuh sida ngayau bepantap ngelaban Raja Merom. Udah menang sida pulai ke Panggau lalu Keling enggau Kumang jadi melaki bini. Nyadi Kumang ngemai orang ba Gelong ngelemba. Lebuh ke ngelemba Kumang seduai Lulong tetemuka tengkelai. Tengkelai nya lalu dipasukka iya ba lengan tak lalu enggai buka. Iya lalu nyabak. Keling enggau Laja lalu begigaka Kumang seduai Lulong. Kumang Seduai Lulong ulih pulai tang sida iya enda ulih tebuka ke tengkelai ke ba jari Kumang. Kumang lalu dipagar sida laban ke nganti remaung munuh Kumang. Kumang lalu mati dibunuh remaung. Lulong lalu nyabak nyuran sinu meda Kumang. Bala sida keling nyelamatka Kumang ari sebayann. Keling enggau Kumang beranakka Sepunggang. Lebuh Sepunggang enggau Kumang seduai Keling kumai dia dih indai keling kesal ati laban meda Sepunggang lenyau. Iya lalu ngaga anak mit nengah tepung beras, lalu diberi nama Tepung Jerah. Lebuh udah besai Sepunggang enggau Tepung Jerah deka nurun nyumpit enggau timpuh ti lama. Seduai lalu dibekalka Kumang utai dempa. Lebuh ke nurun nyumpit seduai betemu enggau Kumang Kenyalang, Bunsu Kamba, Bunsu Remaung, Bunsu Telanjing enggau Bunsu Berenai. Seduai mega bisi betemu enggau Ini Manang Sekurai Marik. Sepemuas ke bejalai dia dih Ini Manang Sekurai Marik lalu ngasuh Sepunggang bebini jadi enggau Dara Utas Berantai Mas anak Ribai. Udah seduai jadi dia Tepung Jerah lalu deka bejakai kediri. Lebuh ke bejalai dia iya betemu enggau Kumang Semunjang Endu Dara Kunchi Hari ti madahka sida serumah kena serang burung besai. Laban ke udah nulung munuh burung nya, dia Tepung Jerah diasuh jadi enggau Kumang Semunjang Endu Dara Kunchi Hari. Laban Kumang Hari nya suba enda sigi dikinginka Entor dia dih Entor nyau ngerachun Tepung Jerah. Tepung Jerah agi idup tang kali kedua Tepung Jerang alah laban ke tetelanka Puchung Entor. Sepunggang ke nemu rita nya lalu mai pengaruh ngagai madi iya. Madi iya Tepung Jerah Suman. Iya lalu deka munuh Entor tang ditagang madi iya Tepung Jerah. Sepengudah nya, Sepunggang deka mai sida melaki bini pulai ke Panggau Libau. Laban orang Panggau enda tau jadi enggau bansa bukai dia dih Raja Ribai lalu nyediaka sepuluh iti kapal  enggau bala soldadu. Lebuh datai di Panggau Libau dia bala soldadu berengkah bepantap enggau sida Bungai Nuing. Lebuh ke bepantap dia Keling lalu betemu enggau anak iya Sepunggang enggau Tepung Jerah. Sida menyanak lalu beberap nyabak. Sida beridup begulai baka selama.

            Gaya enggau pendiau menua

Dunya orang Gelung

Rampa menua orang ba Gelung enda manah laban endang agi bisi ngembuan kampung jerung ti bisi mayuh bansa jelu ti agi diup nyadika penimbang ekosistem. Ba dunya Orang Gelung bisi ngembuan rumah panjai ti diempu sida Kumang lalu kelebih agi ngagai bala sida indu.  Orang Gelung mega betupika jani, manuk, enggau bansa ti bukai. Sida mega bisi bumai enggau bekebun. Ba dunya orang Gelung mega bisi negmbuan pentik penanya ke diengkah orang ba pala tangga dikena nanya temuai ke datai kelebih ngagai bala munsuh ke deka nyerang rumah panjai sida di Gelung. Nambahka nya mega sida di Gelong mega bisi nenun, ngelemba enggau ngaga pengawa ti bukai.  Ba dunya orang Gelung mega bisi pendai ti alai sida mandi bebasu utai. Laban pendiau orang Gelung lebih agi ngagai bala sida ke indu nya sida bisi bepakaika sirih, semakau, buah pinang enggau bisi mega nginsap dikena ngapuska malam tauka diberi ngagai temuai ke datai ngagai rumah panjai sida ambika chunto ba lambar 2 Ensera Kumang tu. Sida orang di Gelung mega selalu ngereja pengawa ti begulai baka sida besulu ba ruai sida Lulong lalu ngemai sida ke indu ngemai sulu diri empu lalu sulu nya ngasilka munyi ti seilu-ilu.

  Dunya Panggau Libau

Gaya pendiau enggau rampa menua ba dunya Panggau Libau mega enda jauh bida enggau dunya orang di Gelung. Sida di Panggau libau mega bisi nupi manuk, nupi jani enggau jelu tupi ti bukai. Gaya pendiau orang ba Panggau kelbih agi diibun orangpungka lelaki baka sida Keling, laja, Sempurai enggau ti bukai. Ba rumah panjai orang Panggau Libau mega bisi ngembuan pentik penanya ba tangga dikena nanya mensia ke bisi datai tuak kelebih agi munsuh. Sida mega ngembuan pendai dikena sida mandi bebasu. Orang di Panggau mega ngasu, nginti seret nyumpit nyadika pengawa sida iya begigaka lauk sereta bumai dikena beridup besehari-hari. Sida di Panggau mega bisi nyendiaka baka sida sirih, semakau, enggau buah pinang dikena sida ngapuska malam lalu dikena sida nyambut penatai temuai ke datai ngagai rumah panjai sida. Orang di Panggau Libau tu mega bisi beperindang bekenaka ruding ti disepu lalu ngasilka munyi ti seili-ilu. Sida Panggau Libau betebahka ruding tu begulai begempuru ba ruai.

1.    Penguan Kosmos

      i.            Dunya Gelong

Ba dunya orang Gelong Batu Nakong Nyinggit Nyinggung Nyandar Nerabang tu kelebih agi diuan bala sida ke indu baka Kumang endang sigi tebilang nama tampak rita siku indu ti bajik sereta pinta, bagas ngereja pengawa kelebih agi pengawa orang indu. Kumang tu mega siku indu ti landik betenun, ngembuan tukuh nyadi tuai ti ngatur sereta ngontrol bala sida ti diau di menua Gelong. Pia mega Lulong, iya lumur dua Kumang indu ti bajik mega baka Kumang. Lulong tu mega indu ti bagas ngereja pengawa sereta selalu betulung enggau Kumang lebuh ngatur pengawa. Lulong nyadi orang kedua Kumang bejalaika pengawa sida di menua Gelong. Baka Ngelai mega aka Kumang ti bisi enggau sida Kumang ba menua Gelung. Nyadi Tutong nya menyadi Lulong. Ngelai seduai Tutong tu mega orang lelaki ti diau ba Gelong mega nyadi ngemudahka pengawa buaki ke bekaul jaul enggau menua di Panggau Libau. Pia mega bala sida indu bukai, baka Endu Semanjar Matahari, Singkap Pinggai Pelangka Dayang Kererang Bintang Tiga, Pemanggai Lempai Umit Pintu Tapang Bebelit Sabit, Endu Kechapah Dulang Libah Pintu Tengekelang Mas, Dara Sato Pemadu Nama Orang, Endu Kechapak Dulang Libak Mua leludak pintu Tapang Tengkelang Dulang Pirak, Indai Ngelai, Indai Lelipai Tusu Panjai Lempai ke Belakang, Endu kandong Nibong Bergerit Endu Setakang Mayang Pinang enggau ti bukai ti sama bisi nguan menua Gelung.

    ii.            Dunya Panggau Libau

Ba menua Panggau Libau kelebiih agi diuan sida pungka ke lelaki baka Keling. Keling tu endang orang beberita ngembuan pengering sereta berani. Keling mega ngembuan gamal ti sigat, iya mega bagas ngereja pengawa kelebih agi pengawa orang lelaki baka nyumpit, ngasu, nginti enggau ti bukai. Keling tu mega siku orang ti pandai ngatur pengawa ba rumah panjai sida di Panggau Libau. Udah nya Laja, Laja tu mega orang kedua Keling. Laja mega orang ti kering mega, sigat gamal manah, bebasa ke orang tuai enggau biak. Laja mega bagas ngereja pengawa kelebih agi pengawa orang lelaki. Baka Sempurai seduai Sempungga mega nembiak ti bisi ba menua sida Panggau Libau dua iku tu mega manah ati sereta bagas ngereja pengawa. Seduai mayuh nulung bala sida Keling di Panggau Libau. Ba dunya Panggau Libau dia mega bisi sida Pndak Atak, Renggan, Geluma, sida Achu, gaih, Kukul, Kendih, Sida Anchit, Apai Igul, Apai Bujang Tuai Sarat Sakai Pemanggai Lintang enggau mayuh agi sida ke nguan menua  Panggau Libau dia. Ba Panggau Libau mega bisi sida Sepunggang enggau Tepung Jerah iya nya anak Keling seduai Kumang sepengudah seduai bejadi melaki bini

1    Ukur Pemanah Ti dikemeratka

Ukur pemanah ti dikemeratka dalam ensera Kumang tu iya sida selalu betulung lebuh ngereja pengawa. Ambika chunto lebuh Kumang ngemai sida serumah besulu dia iya ngemai Lulong betesauka sida serumah kelebih agi sida ke indu. Lalu semua sida nadai mantah. Pia mega orang di Panggau Libau, sida mega selalu besaup ngereja pengawa lebuh Keling ngemai sida beruding dia Laja diasuh nesau sida serumah baum beruding begulai ba ruai. Semua sida di Panggau mega nadai mantah. Ukur pemanah ke dikemeratka mega sida Kumang di Gelong endang bagasa ngereja pengawa baka pengawa rumah panjai sida mega betuchi ke utai, nyumai lalu sida bisi betupika jelu tupi. Ambika chunto lebuh Kumang ngemai sida indu di menua Gelong ngelemba semua sida nurun sampal begigaka daun lemba dikena betetunka pua kumbu. Semua sida ke indu endu bagas udu ngereja pengawa. Kepenudi sida ba kosmos Gelong enggau Panggau tu sayauka pangan diri enggau manah enggau pangan diri. Ambika chunto, sida nadai kala belaya tajapan Kumang enggau Lulong ngelenyauka sulu Keling enggau Laja, lalu lebuh Keling enggau Laja ngelenyauka ruding Kumang seduai Lulong. Nyadi nya mega digaga bala sida ke diau ba Gelong enggai Panggau Libau ngasuh sida begulai manah enggau pangan diri.

Sanding Penemu

Jimmy Donald, (2004). Ensera Kumang Ari Gelong Batu Nakong Nyinggit Nyinggung Nyandar Nerabang. Kuching. Medansains Jaya Sdn. Bhd.