tatabahasa standard Iban (STANDARDISASYEN JALAI JAKU IBAN).

           

                               

          TOPIK: STANDARDISASYEN JALAI JAKU IBAN.

Keterubah iya, standardisasyen ngagai jaku Iban ulih digaga enggau manah nengah ngasilka siti bup Jalai Jaku Iban ke dikarang sida ke anda sereta landik lalu ngatur semua jalai jaki Iban nyadi siti jalai jaku ke ulih dikena ba pelajar enggau pengidup besari. Enti kitai meda enggau Melayu, sida bisi bup “Tatabahasa Dewan” ti nyadika malin sida ia ari suba nyentukka diatu. Nama kebuah kitai bansa Iban nadai runding baka sida deka ngaga nya, nya meh kitai patut merening tujah pemansang tu awakka Bup Jalai Jaku kitai tau nyadi siti kereban sanding enggau malin bansa bukai. Beduduk ari nya, kitai bansa Iban deka nitihka atur nya enggau ati ke meruan sereta bela ngena bup nya maya kitai deka bejaku, berandau enggau ngaga siti-siti langgur pengawa ke begunaka bup Jalai Jaku Iban. Sepengudah bisi bup nya, kitai muntang agi deka nyeruri jalai jaku ti dikena lebuh bejaku tauka nulis. Kekadang, kitai mayuh amat leka jaku ke baru lalu mayuh enda ulih ditulis kitai ba dalam bup nya, tang maya kitai ke belajar ngena bup nya kelebih agi sida nembiak ke agi mansik senentang sintaksis tauka bup jalai jaki Iban tu tau ngaduka lalu nyeleti iya manah agi awakka kitai ulih ngaga atur baru lalu tau dikena bansa Iban ke dudi hari belajar lalu sida enda lenyau leka jaku ke patut dikena sida iya maya belajarka jaku Iban ba sekula tauka ba endur bukai. Kelimpah ari nya, lebuh jalai jaku kitai sama dia semua bup, magazin, jerpan enggau kereban informasyen ke bukai deka begunaka malin bup jalai jaku Iban ke baru nya. tu lalu madahka bansa Iban udah bulih pemansang negah jalai pelajar lalu bisi tikas ke tinggi agi nyerumba pemansang dunya kemaya hari.Nengah jalai negepka agi Sistem sepil jaku Iban mega tau nyadika siti atur dikena meri standardisasyen jaku Iban. kebuah pia, tajapan udah digaga bup sistem sepil jaku Iban tang ba dia kitai semina nitihka enggau bansa bukai lalu meri translaysen ngagai jaku Iban lalu mayuh chunto enggau penerang ke enda entu engkeman dikena maya begaga jakau Iban lalu maya begunaka bup nya nyadi malin. Utai ke selalu saru dikena bansa Iban maya begagaka jaku tauka maya betuliska jaku iya nya sepil ke dikena kitai mayuh enda sama, bisi sida ke enda kena rimbas pemansang dunya lalu agi ngena sepil lama suba dia sida deka ngena sepil lama nya baka sepil “semaya” tang sida agi ngena “semaia” bakani kitai patut meri sepil ayat leka jaku nya tau nyadi siti sepil ke betul lalu ulih dikena raban bansa Iban begagaka kereban ke nengah jaku Iban lalu ba tau nyadika siti leka jaku ke diterima kitai. Ambika chunto kebukai mega, dalam jaku Iban mega kitai bisi tepeda bisi kitai nginjau jaku ari jaku bansa bukai kelebih agi ari jaku orang putih. Chunto iya, “driver” lalu kitai Iban nyebut “driba” nadai salah ba jaku kitai Iban tang lebuh maya nya nyadika malin bansa bukai dia kitai deka pemedis laban nadai leka jaku ke bukai ke ulih meri reti ngagai leka jaku “driver” nya. Nya meh kebuah bup sisitem sepil tu patut digaga enggau manah agi awakka kiitai bansa Iban, kelebih agi bala sida ke agi besekula nya nemu bakani nguna jaku Iban enggau engkeman itihka bup ke udah digaga bala sida ke anda seretalandik ba penemu sistem sepil tu. Nitihka pemansang dunya, kitai tau ngaga semua tu lalu ulih nitihka pemansang bansa bukai ke diatu. Nya alai, suah kita saru sekalika bejaku tauka nulis ngena jaku injau nya. Tang leka jaku nya ditukar laban ti ngembuan reti iya ba jaku Iban. Nitihka Asmah Haji Omar (1995) pengelentur ba jaku Iban siti ari kriteria sistem sepil ari ti nginjau jaku bansa bukai laban nitihka pemansang dunya. Nambahka nya mega, sistem sepil ti entap ulih ngasuh semua sepil leka jaku nya sebaka. Kelimpah ari nya, pengerembai jaku Iban deka lenyau sereta ngeleput enti nyema nadai orang ti nulung nyelak bup nya tajapan bisi orang ti nulis bup nya. Enti sba kitai bisi Bornoe Literature Bureau(BLB) ti nulung bansa Iban nyelak bup ke ulih nyadika malin bansa Iba, tang diatu BLB udah nadai agi bakani kitai tau ngerembaika jaku Iban enti kitai nadai orang ke pugu ke ulih meri pngerekai jaku Iban kitai. Tun Jugah tauka dikumbai Tun Jugah Foundation nyadika siti palan kitai bansa Iban ti ulih nulung jaku Iban nyadi standard sereta bisi ngundan pemanah. Manah amat tanggung pengawa Tun Jugah tu laban pemansang sererta pengerembai jaku Iban deka bepanggai ba sida iya. Ngangkatka Tun Jugah tu patut dipajakka awakka ulih bediri sama tikas sebaka enggau Dewan Bahasa dan Pustaka (DBP). Fungsyen Tun Jugah tu amat mayuh laban diatu mayuh amat kereban pelajar tauka utai bukai bepanggai ba iya. Nya alai nengah tu kitai tau minta kuasa sida iya ngaga siti bup ke madahka jaku Iban tu tau standard enti semua kitai ngena leka jaku ke sama lalu semua leka jaku nya ulih diperetika orang Iban ba seluruh Sarawak ditu. Ambika chunto baka ba bup teks jaku Iban kitai tau minta tulung sida nyelak awakka kitai ulih ngubah leka jaku ke enda entu engkeman dikena ngagai leka jaku Iban kelebih agi nyadi manah sereta nemban dikena lalu semua bansa Iban enda saru maya ngena iya. Nya alai nengah tu, jaku Iban ulih standard sebaka enggau bansa bukai.Kelimpah ari nya, ba Sarawak ditu bansa Iban mayuh amat komuniti ke ngena jaku ke enda sebaka, kebuah pia laban nitihka pelilih ai lalu nitihka factor pemindah bansa Iban dulu kelia tauka kena biuh sereta bisi empas ari pemansang dunya kemaya hari. Variasyen jaku ke enda sama nitihka endur tauka pelilih menua diri empu ti dikumbai dialek. Nya alai  jaku Iban pen enda ulih nyeliahka perkara tu. Mayuh amat variasyen ba dalam dialek jaku Iban baka Sebuyau, Balau, Saribas, Batang Rajang enggau ti bukai endang bisi besibil ba sekeda aspek jalai jaku enggau leka jaku. Ari pemayuh dialek nya, kitai patut nemu nama variasyen jaku ke patut diambi ktai nyadi jaku ke standard lalu ulih dikena semua bansa Iban ti ngasuh sida mereti ke dialek nya. Jaku Iban standard bebida ari dialek kebuah pia, laban iya ngembuan pelasar sereta bechuanka atur sepil, jalai jaku, sebut enggau terminology Kediri empu. Jaku standard dikena ba pengawa formal lalu dialek dikena ba pengawa ukai formal. Nya alai, jaku standard tu mesti dipelajarka laban kitai maya nulis surat, besekula,enggau pengawa formal ke bukai mesti ngena jaku Iban standard tu. Nya meh kebuah kitai tau nemu jaku Iban tau masang laban kitai meda ari raban bansa Iban ke ngena jaku Iban standard. Ari tu jaku Iban tau nyadi standard.Nambahka nya, standardisasyen jaku Iban tau ditegapka agi nengah ngerembaika lalu meri tikas ke tinggi agi ngagai jaku Iban ba pengawa sekula. Diatu, jaku Iban ukai semina diajar ba sekula primary tang bisi diajar ba sekula sekondry lalu bisi diambi ba peresa PMR enggau SPM. Nya meh kebuah nembiak kemaya hari patut belajar lebih agi penemu jaku Iban tu awakka sida ulih ngerembaika jaku Iban tu enggau manah agi. Nangkanka nya mega, jaku Iban mega diatu udah bisi diajar ba pelajar ke tinggi agi ia nya ba kolej pematih pengajar enggau ba universiti. Ambika chunto, ba Institut pematih Pengajar ba Bintangor udah ngambi raban nembiak Iban lalu meri ajar ngagai sida belajarka jaku Iban enggau lebih dalam agi lalu ba Universiti nkitai med aba Universiti Pendidikan Sultan Idris mega bisi belajarka jaku Iban. Ditu kiati nemu, jaku Iban tu tau nyadi standard laban kiati bisi ngenanka jaku Iban tu enggau naka manah sereta kitai udah bisi jalai ngaga siti chara ngetanka jaku Iban lalu ngerembaika iya nyadi siti jaku ke sama tikas enggau bansa bukai.Kesimpul penemu iya, jaku Iban tu enti iya dipemansangka iya deka ngerekai lalu nyegang tajapan pemasang dunya majak ke mua. Kitai Iban ukai enda nemu mansangka jaku Iban tang kitai takut enti tubuh kitai mimit pengawa nya deka nyadi baka jaku sempama “baka kepayang ngedarka dilah” ti mai reti semina bejaku aja tang enda ngereja iya enggau penapat inat. Nya meh kebuah kitai patut begempung ngemansangka jaku Iban tu awakka kitai dipeda bansa bukai bisi pemansang ke ulih meri standard jaku kitai Iban. Ka ngemajuka bansa majuka dulu diri empu awakka kitai bisi ngembuan pemaik ulah ke manah ti tau mai pengelantang ngagai diri empu, bansa diri sereta menua kitai. Pengentap jaku Iban enti nitihka sejarah iya ending udah entap suba laban kitai ending sigi belajarka jaku Iban ari suba sereta kitai bisi mega malin sereta utai ke nyadika sanding kitai ia nya BLB suba. Tang laban nya diatu udah nadai ka pen enda kitai bepun ari mua nyentukka ke belakang ngemansangka jaku Iban ba Sarawak ditu. 

LIRIK LAGU : AYAN KE MIH BY: LAILA BJ ft  JESSICA REMAYA

sembayangka Bilun MH 370 

Kini meh alai ke penerebai nuan

Ba ats remang lalu enda sangkai

Nyema bebadi ayanka tubuh nuan

Kami ti irau nganti penatai pemulai nuan

Ai mata naya seruran bekenang

Nganti penatai rita pemulai nuan

Oh petara dingaka meh sada kami

Sebanaka penusah ti nyadi nuntung iya

 c/h

Ayan ke mih  ayan ke mih

Nuan lenyau kani irau

Ayan ke mih ayan ke mih

Sinuka kaban belayan ti nganti

Pemulai nuan

Ayan ke mih  ayan ke mih

Nuan lenyau kani irau

Ayan ke mih  ayan ke mih

Sinuka kaban belayan ti nganti

Pemulai nuan *ulang dua kali

Mina ngagai nuan tuhan kami bepanggai

Minta nuan nyagi iya ulih sangkai

Kesah ke penusah ari nyadi mh 370

Ulih selamat pulai

Ooohooohhooooo.. Pulai meh semua

.https://www.youtube.com/watch?v=OGwoRa3YJEQ

Jurai senentang sinonim, antonim, polisem, hiponim, gentilang reti enggau konotatif dalam jaku Iban

                                                                                                                                   Reti semantik.

Semantik nya siti bidang ti mansik lalu nguse reti jaku enggau ayat. Leka jaku nya siti ari utai disebut lalu nyadi siti randau ke mers lalu bisi ngembuan reti iya. Dalam jaku kitai ulih mantaika gaya runding, buah runding, emosyen, ulah enggau perangai siku – siku mensia.

Definisyen ari sukut istilah mega, semantik mega dati ari jaku Yunani “semantikos” ti mai reti berguna lalu ngembuan reti. Enti dipeda ari definisyen ke diberi  sida ke and aba penemu semantik tu iya nya madahka semantik tu siti cabang linguistik ke ngemeranka reti (J.W.M. Vehar, 1996). Nitihka kamus dewan, semantic mai reti mansik senentang reti leka jaku enggau penambah reti ba siti – siti leka jaku. Sechara rama, semantik tu iya siti ari bidang penemu senentang reti enggau reti ke berubah ba siti – siti leka jaku. sechara saintifik mega madahka semantik tu mansik senentang lambang – lambang tauka kelai ti madahka reti, kaul entara reti enggau reti ke bukai.

1.2.         Konsep Semantik

Nitihka Ferdinand de Saussure, semantik nya siti jaku ke disebut dikena ngenataika reti. Choamsky madahka semantik nya reti ayat ke ditentuka struktur konteks  maya ayat dikena. Pia mega, semantik ukai semina meda ba reti aja tang ba pengerembai iya ke disebut “semantic sejarah” (M.Beral. 1893)

Ke simpul iya, semantik tu siti bagi ari bidang linguistik ke mansik jaku ngena jalai ke likun. Semantik mega ulih  nyadi siti bidang ke mansik reti leka jaku enggau ayat ba jaku. Pansik  ke ngembuan kaul enggau reti leka jaku ulih dipeda ba sukut reti, denotasyen enggau konotasyen, reti ba konteks, kaul reti enggau daya idup, tranformasyen reti enggau tukuh – tukuh reti ari kaul semantik.

1.3.        Sinonim

Leka jaku sinonim datai ari leka jaku  Yunani kuno, iya nya onoma ti mai reti ‘nama’ enggau syn mai reti ‘enggau’. Reti sinonim iya nya siti leka jaku, frasa, ayat mai reti ke sama tauka kurang lebih sama. Ambika chunto iya, leka jaku  Jabang enggau Empasa. Indai mayuh amat nanam pun jabang sereta epasa ba kebun iya lalu enti ngena leka jaku empasa mega pen sama iya nya Ini Melina ngiting daun empasa ba tengah laman. Reti leka jaku ba atas nya endang sama tajapan sepil iya jauh bebida. Nitihka menua siti – siti mega bisi mega orang ngena leka jaku empasa, jabang tauka ubi. Semua nya nitihka pelilih ai lalu iya mega mungkur reti ke sama magang. Nya kebuah iya dikumbai sinonim.

Pia mega baka reti buruk enggau ngelusu. Ba jaku Iban buruk tu siti leka jaku ke madahka siku orang nya enggai ngaga  siti – siti pengawa. Ambika chunto iya, Igat buruk amat ngaga pengawa sekula ke dibei pengajar iya ba sekula. Lalu ngena jaku ngelusu , ambika chunto iya Merikan ngelusu amat kereja nyentuka iya diburu apai iya ari rumah. Ba ditu buruk enggau ngelusu tu agi ulih dikena meri reti ke sama laban iya agi bekaul enggau perangai siku – siku orang nya madahka enggai ngaga pengawa. Taja pia, ba jaku ngelusu tu mega, bisi siti agi reti ke sama ngena leka jaku tu iya nya madahka telih tauka abi lita ba tubuh siku – siku orang maya iya bisi terap tauka tetingkap. Ambika chunto iya, pala patung Jagai nyau ngelusu dibai iya terap ba bilik mandi ke lichau. Berasai nyemetak bendar gak reti sinonim ba ditu enti dipeda.

1.4.        Antonim.

Leka jaku antonim mega datai ari leka jaku Yunani kono iya nya onama ke mai reti ‘nama’ enggau anti ‘ belaban’. Nya alai antonim tu leka jaku ke mai reti ke belaban reti enggau siti leka jaku ke bukai. Ambika chunto baka leka jaku dua iti tu duduk enggau bediri. Ba jaku Iban mega duduk tu siti leka jaku madahka orang nya benung duduk ba siti alai baka bangku tauka utai ke ulih endur duduk. Ambika chunto iya, Apai duduk ngerimbai aku maya tua iya nepan bas. Lalu leka jaku ke belaban reti enggau leka jaku tu iya nya baka chunto tu Indai nyau berasai lelak laban ke lama udah bediri ari tadi. sebaka enggau sinonim tadi mega enti tadi sama reti diatu belaban reti. Chunto kedua mega baka leka jaku dua iti tu iya nya, jauh enggau damping/dampih/semak. Chunto ke engkeman ba jauh iya nya  rumah sida petunggal aku jauh bendar laban sida diatu udah bisi rumah ba London. Lalu leka jaku ke belaban reti enggau leka jaku jauh nya baka tu Sekula sida Dom damping/semak/dampih amat ari rumah panjai sida.

Ba leka jaku ke belaban reti ba atas nya tadi kitai tau nemu nama kebuah iya tau belaban reti kebuah pia, jauh tu madahka reti enda damping lalu enti kitai meda ari sukut jam iya mega beguna ke jam dikena ngenataika diri maya deka ngagai siti – siti endur nya, lalu damping tu siti leka jaku madahka endur nya semak lalu enda jauh lalu enti beguna jam ka ngagai endur nya enda entu begunaka awak mayuh dikena kia. Ba penerang nya tadi kitai tau nemu nama kebuah seduai belaban reti.

1.5.        Makna Konotatif

Reti konotatif bebida enggau reti emotif laban reti konotatif tu betukuh negatif.  (Fathimah Djajasudarma, 1999) madahka, reti konotatif datai dikena meda empas asosiasyen pengasai ati kitai ngagai utai ke dipejaku tauka maya utai ke didinga.

Reti konotatif mega mai reti ke bisi kaul enggau pemesai guna pengasai ati , baika nya positif tauka negatif. Ambika chunto,           pengasai ba leka jaku ‘makai’ enggau ‘majuh’. Keterubah, makai tu iya pengawa kitai ke bekena ke pinggai  ti bisi nimbun asi tauka utai diempa. Leka jaku makai tu endang dikena ba bansa Iban  iya madahka makai tu siti pengalus jaku tu dikena rama, lalu semua orang nemu nama reti makai nya.

Majuh tu mega siti leka jaku ke sinonimi enggai makai. Majuh tu siti leka jaku madahka makai mega ba bansa Iban, tang tu sigi leka jaku ke enda manah ba madahka kitai mensia makai lalu leka jaku majuh selalu dikena maya meri uduk, babi tauka mayau makai. Nya alai nitihka konsep konotatif ba ditu, makai tu enti nitihka pengasai ati orang ke ninga lebih manah sereta bisi ngembuan budi enggau basa laban iya endang siti leka jaku ke manah dikena ngangauka orang ke deka makai. Tang majuh tu kelalu enda manah tang mega agi dikena ba bansa kitai Iban laban endang siti leka jaku kitai Iban. Nya alai enti kitai ngangauka mensia tauka temuai ngena leka jaku majuh tu maya madahka orang ke deka makai enda entu manah laban iya kelalu renjan. Nya alai kitai ulih ngena leka jaku majuh tu ba bala jelu baka mayau, uduk enggau babi.

1.6.        Hiponim.

Ba bup Nik Safiah Karim enggau Wan Malini Ahmad(2006) madahka hiponim tu siti ari leka jaku Yunani kuno/lama iya nya onama ti mai reti ‘nama’ enggau hypo ‘mungkur’. Hiponim ba leka jaku mai reti leka jaku ke siti aja lalu ulih mungkur reti utai bukai ke sama enggau iya. Ambika chunto baka leka jaku bumai.  Baka tu chunto iya enti dipeda ba pengidup bansa Iban. Bansa Iban ba Sarawak mayuh bendar agi ngemeratka pengawa bumai. Bumai ba bansa Iban kitai bisi bumai bukit enggau bumai paya. Bumai bukit tu umai ke diperimba ba endur ke nadai ai lalu selalu iya tebiang, tang umai paya tu umai ti diperimba ba endur ke basah lalu iya dikumbai paya. Nya alai bumai tu tadi ulih mai kaul ngagai bumai bukit enggau bumai paya. Enti nitihka pelilih ai ba menua Sarawak tu orang ke mayuh bumai bukit lebih agi ba menua pelilih batang Rajang baka kapit, kanowit enggau ulu Batang Rajang. Lalu enti ba bumai paya mega mayuh dipeda kili agi baka ba Sarikei, Sibu enggau mayuh agi.

Kelimpah ari nya, baka leka jaku makai. Bakani leka jaku makai tu ba jaku Iban ulih naydika hiponim. Peda ba chunto baruh tu nitihka konsep bansa Iban. Maya makai kitai suah bendar makai nitihka jam tauka maya makai ke ditaga. Makai tu bisi iya makai pagi, merarau, makai lemai enggau makai salau. Makai pagi nya endang suah digaga kitai dikena kitai meri pengering ngagai tubuh sebedau merarau, udahnya merarau dikena kitai meri pengering ngagai tubuh sebedau makai lemai. Tang makai salau tu enda suah digaga laban iya semina digaga maya pengerami aja, maya nya orang ngangauka kitai serumah panjai dibai makai salau

Lalu ba konsep jaku Iban mega ba leka jaku ikan ulih nyadika chunto dikena neguhka agi reti hiponim tu iya nya bak chunto di baruh tu, Ikan ulih apai Simah nyala mayuh amat nyau enda chukup uyut dikena ngema. Bisi nya ikan semah, adung, enseluai, panjut sereta mayuh agi. Dalam konteks ikan tu mayuh mai reti laban ikan tu mungkur mayuh reti. Chunto iya ikan ai sungai tabau sereta ai tasik ti masin. Ikan ai sungai tabau baka nya tadi bala sida enseluai, semah, panjut sereta mayuh agi lalu ikan ai tasik masin baka ikan sadin, tenggiri, tongkol enggau mayuh agi. Lalu ikan mega bisi mega salai ikan, sadin ikan, kasam ikan, ikan guring, ikan tunu, ikan pansuh. Bisi ga ikan betisik, enda betisik lalu mayuh agi konsep ti mungkur reti ikan.

1.7.        Polisem

Nitihka Nik Safiah Karim enggau Wan Malini Ahmad(2006) madahka polisem tu siti tukuh ke bisi ngembuan lebih tauka siti reti ba siti – siti leka jaku. ambika chunto empa. Ba jaku Iban kitai ba Bup Sereba Reti(2011) leka jaku empa tu bisi ngundan empat reti. Reti empa keterubah iya nya masukka pemakai baka lauk tauka asi ke dalam nyawa, ngunyah iya reredak udah nya baru nelan iya awakka kitai tau kenyang. Ambika chunto iya baka tu empa ambis asi enggau lauk nya ulih nuan laban nya endang diungkup aku ke nuan.

Udah nya. Leka jaku empa kedua mega mai reti kena laban utai tauka pemedis baka penyakit tauka utai bukai. Ambika chunto iya baka tu, sepengudah kena empa jayau, igat bendar amat beraie siang enggau malam, makai pen semina negu asi. Pia mega, baka leka jaku tu Tegung dianjung Indai iya ke sepital besai laban kena empa kayap. Chunto ke bukai baka chunto tu, umai sida Marry sebilik angus amat empa api.

Lalu reti empa ketiga iya nya madahka empa tu mai reti sebaka enggau ketegal; bai ; laban. Ambika chunto iya baka tu, empa penyumbung anak tuai rumah nya, semua orang laki ke enda kereja enda diperening iya maya orang laki ke nanya indu ngagai rumah sida.  Pia mega, baka chunto tu, empa pemeli Menon, sanggup iya enggau orang terjun ba gerugu batu ke tinggi nya.

Lalu reti empa ke penundi bendar iya nya mai reti pemadu; pengambis; naka. Ambika chunto iya, Indai Meni nyabak empa penusah ati ketegal laki iya ke midang maya bekeraja nyadi sedadu. Pia mega chunto iya kedua baka tu, empa penusah ati Ini aku nyau deka luput ninga rita Aki aku ke labuh ari puchuk mutan

1.8.        Gentilang reti.

Definisi Konsep gentilang reti.

Nitihka penemu Ramli Salleh et al., (1997) gentilang reti  nya siti raban ke mit aja ba sukut leksikal ti madahka reti iya agi bekaul laban penatai diri ba konteks ke sama. Nitihka Kamus Dewan mega, gentilang (medan) tu mai reti kandang ke mit, lalu reti (makna) nya reti.

 Teori semantik;

Maya deka meri jurai senentang gentilang reti tu endang siti pengawa ke bepelasarka penemu bala sida ke anda ba penemu gentilang reti tu. Ambika chnuto nitihka penemu Lehrer (1974) ba bup Kamarudin Hj. Husin enggau Siti Hajar Hj. Abdul Aziz (1997) madahka pansik senentang gentilang reti tu digaga sida Berlin enggau Kay ba tahun 1970 iya nya senentang reti chura enggau penysempadan reti chura nya. Ba pengawa tu mega, mayuh orang enda setuju lalu mayuh gak buah penemu enggau tuju kuing runding sida iya bebida senentang enggau pansik nya baka reti chura mirah enggau oren. Dia mega kitai deka ngiga dini pemisah tauka penyerara sempadan entara dua iti reti tu awakka nyadi buah pengawa orang tauka entara siku – siku orang ti meri tisih ngagai reti nya.

Nya alai ngujungka gentilang reti tu nyadi utai ke pengamat beguna laban gentilang reti tu nyadi siti utai ke meri kaul ngagai beberapa leka jaku dalam raban ke kediri dikena meri reti ngagai leka jaku ke  deka kitai. Nya alai gentilang reti tu enda ngasuh kitai semina meda sechara beserara ba tiap unit leka jaku nya ba dalam  iya dikena ngadaka reti ngagai siti leka jaku ke dipilih.

Nitihka Lyons(1993) ba bup Kamarudin Hj. Husin enggau Siti Hajar Hj. Abdul Aziz (1997) madahka ba tahun ke belakang agi mayuh orang deka mansik ngagai sistem leksikal ba pengaya leka jaku ti bebida enggau kereban sanding ke spesifik ngagai gentilang baka leka jaku chura, flora enggau fauna enggau mayuh agi. Ba ditu, Lyons ngmbi chunto ba gentilang reti chura; mirah, gadung, jingga. Kuning enggau biru, tajapan penuduk relatif ba sistem leksikal iya entap, baka chura jingga tadi duduk ba entara mirah enggau kuning, kuning entara jingga enggau gadung lalu udah nya enggau ke bukai. Gentilang reti ke dilanggup lima iti istilah chura nya semina ulih diterima ba kereban persepsyen tauka fizikal.

Pia mega, Abdullah Hassan(1980), ba bup Kamarudin Hj. Husin enggau Siti Hajar Hj. Abdul Aziz (1997) madahka ngiga buah penemu dikena meri reti ngagai siti – siti leka jaku nya. Pia mega iya meri reti ngagai leka jaku ‘universiti’ baka ba grafik dibaruh tu;

  

Pengelicha, professor                              Kuliah, bup                                                                              Institusi tinggi UNIVERISTI                         Kajian                                                    Makmal, pustaka                      Kampus  desasiswa

                  Grafik 2: Gentilang reti ba leka jaku ‘universiti’

Semua leka jaku ba dalam grafik nya nunjukka raban gentilang reti ba leka jaku ‘univeristi’ iya nya tiap iti leka jaku nya bis kompenen tauka bagi kediri ba reti leka jaku univeriti tadi.

kereban sanding.

Bup sereba reti.(2011). Tun Jugah Foundation. Kuching.

Kamarudin Hj. Hussin @ Siti Hajar Hj. Aziz(1997). Pengajian Melayu 2. Kumpulan Budiaman

Sdn Bhd. Kuala Lumpur.

Kamus Dewan Edisi Keempat.(2007). Dewan Bahasa dan Pustaka.

Nik Azis Pa @ Norani Idris (2008). Perjuangan memperkasakan pendidkan di Malaysia

(pengalam 50 hari merdeka). Utusan publications @distributors Sdn Bhd. Kuala Lumpur.

Nik Safiah Karim @ Wan Malini Ahmad.(2006). Bahasa Melayu STPM. Penerbit Fajar Bakti

Sdn. Bhd. Selangor.

http://kumpulansiswazahguru.blogspot.com/2012/04/semantik-dan-peristilahan-bahasa-melayu.html.  Digiga maya 25 Julai.

Tantrapuan. Relasi makna. http://tantrapuan.wordpress.com/2009/05/13/relasi-makna/ . diakses

pada 11. Julai .

Sinonimi dalam relasi maknahttp://jhoesangpemimpi.blogspot.com/2013/04/sinonimi-dalam-relasi-makna.html . Diakses kena 11. Julai

Nguse Leka Main (Pantun Iban)

1

Topik: Pantun Enda Ampit Indu Dara.

Aih.. .. … .. .. .. .. ..  melan asi melan

Nadai enda ngemanah nya orang indu

Kerangan kini amang lubuk ridan

Sayau iya dikumbai orang endur baung betembung

Intu tempaung laya sakam

Belayaka leka padi rara

Buah besa rira lebat bereminan

Sigi nya menyadi di ambi aku ke dik

Satu enggi aku Sembilan enggi nuan

Nama sida iya dikumbai orang

Belayaka tandan nya tadi indu bantang

Ama .. ..   ensurai nunggang

Aih .. . . .. … .. ..   .. anang sekakai rawan dik menyadi wai

Ditantaika aku bejenggai nyamai bedindan tu ai beram

Kati dik enda nemu wai tubuh bela tu luli lenta

Bangat udu pemerinsa

Aku betatika rimba enggi kami orang lelaki

Dulu dia simpang bila meh mengkanan

Aku betatika umai enggi kami orang laki menyadi wai

Bangat bedau leladai madang kelampai

Kayu ke ladan  nama kemarau

Enda ninga dik orang indu

Bangat nadai nya enggau nyuruh bekembung nya bulan

Lapan hari jai nya menyadi lelangang kudi berunggul ujan

Ai besai menyadi wai enda lega

Besai ngampuhka ke emperan

Dini enda baka nya

Kati dik nemu uduk ka jadi enggau mayau

Tinduk segulai tilam

Besilika puak ke siti aja sili sima

Nya nabau ngeraran

Kati dik enda ninga rita jelu babi dik dayang keranchi.

Bangat tak nyelai ati datai ari kampung sunyi

Ka nyadi kerani duduk di kerusi nya minja intan

Manah wan jelu menarat enda ninga dik menyadik

Ngumbai diri berita lanchat ngelaban jugam

                                                   

Pama nya orang indu ngumbai diri tau berita

Ngintu tekura pedis pala sakit lengan

Buang indu bantang ngumbai diri nemu nimang lalu beramban

Kera empu nya orang indu bula udu ngumbai

 diri nemu nyagu iya lalu nanam

Kati dik nemu nya landak ka mumpung tuak sari semalam

Kechai nya orang indu ngumbai diri melandai

Minta salai tiga kerungan

Laban sida ka gawa nanga nya gawai mudan

Ngintu paung subung ditanam

Ngintu batang indu bantang tempasa …..  ipang

Aihhhh..  . … .. . . . . lembau bendar enda ninga

Ulah petunggal laban aku ke udah nyambut

Udar kereja solider sedadu tuan

Laban enda tau ngena nya orang indu barang ngapa

Macham sebelian

Enda tau nepis duit macham periman

Enti maya pagi ari nyerumba

Jam lapan aku takut kena ukum

Tuan trojen ningkan beselup arm

Bebaul tan kaki kanan ka berumban jari beseliman

Nya indu bantang ngedarka rumbang iping…… ngerang

Aihhh…….    Ni ke udah regista nya indu dara sain nama

Kati ke enda enggau orang meting ke Kuching

Ke ai ngelan ngetu di Terengganu angkat ke George sultan

Andas kabilas ngetu di Labuan

Ninga bisi dik nunggu kunsil orang indu ba Lahad Dato

Tentang enggau piku George sultan

Lebuh nya ka ngimbuh di jalai lurus

Ngayuh ke bom gerinit tikam de lelingan

Indu bantang san rumbang gawai .. .. . puang

Aih………anang sekakai rawan enggai dik menyadi wai

Ditantai kelempang pangai aku bejenggai nyamai

Begindan aku tu ai beram

Kapa meh tubuh bela aku tu wai

Enda kekalat ngapa tubuh rempan aku sidan

Tusah . . di dalam wai…..

Sayau meh kami orang laki tu menyadi

Bangat enda ampit enggau kita megai laman

Kasih limbang kita endun kumang

Padang …. Nengeri Limbang

Nguse leka main ti dipilih ari sukut estetik.

Leka main tu deka dikuse ari sukut estetik, sechara rama iya estetik nya betukuh relatif tang ia enda kala ngelui dikena nisih tauka dikena meretika elemen – elemen ke bisi. Pemanah siti ba pengawa ke ditengkebang nyadi sechara berurun enggau elemen – elemen ke bukai. Kelimpah ari runding orang ke ngaga,  pemanah leka jaku, tukuh struktur enggau tema ia ke patut diseleti enggau likun awakka ngasilka empas estetik.

Dalam jaku Iban kitai bisi ngembuan leka main ke diri empu. Leka main nya ulih dibagi ngagai tiga. Keterubah iya nya leka main dikena beperindang, udah nya leka main dikena tabi basa lalu ketiga leka mai bansa konvensyen. Leka main dikena beperindang nya baka pantun, ai ansah enggau mayuh agi, dikena tabi basa iya nya baka biau lalu leka main bansa konvensyen iya nya baka  sampi, pelian, perua enggau ti bukai.

Ba leka main ke dipilih tu aku deka nguse siti leka main ari leka main dikena beperindang iya nya pantun. Topik pantun tu iya nya pantun enda ampit indu dara. Ba dalam leka main tu aku deka nguse ari sukut pengaya leka jaku iya nya hiperbola enggau mentafora. Hiperbola tu siti ari pengaya leka jaku ke mansik senentang meri banding ngagai utai ke di sema nya nyau kelalu sereta ngilah ari adan. Hiperbola tu mega dikena nunjukka reti utai tauka lekajaku, ayat tauka rambai jaku ke lebih – lebih. Ambika chunto ba dalam leka main pantun enda ampit orang indu ba atas  nya:

Bangat tak nyelai ati datai ari kampung sunyi

Ka nyadi kerani duduk di kerusi nya minja intan

Manah wan jelu menarat enda ninga dik menyadik

Ngumbai diri berita lanchat ngelaban jugam

Dalam genteran pantun ba atas nya, dia kitai ulih meda rambai jaku ke dikena iya nya ka nyadi kerani duduk di kerusi nya mija intan. Ba genteran nya, madahka utai ke deka dipadahka iya nyau lebih – lebih sereta reti iya nyau dikerajuka. Maya iya ke nyebut kerani nya duduk ba kerusi mija intan, nyau lebih amat mija nya disemaka iya nyau baka intan. Kitai semua nemu, mija semina ulih digaga ngena kayu lalu bisi gak ngena kaca enggau barang plastik. Nya alai, maya iya nyemaka mija nya baka intan nyau udah kaya amat kerani ke duduk ba kerusi mija intan nya. Pia mega, ba genteran ngumbai diri lanchat ngelaban jugam. Ba genteran tu nyau mandingka pengering siku – siku mensia, ba ayat nya  mega iya madahka lanchat ngelaban jugam. Naka meh penegring mensia nya ngelaban jugam enggau tubuh murus. Nya meh meri pansik ke engkeman ngagai reti pengaya leka jaku hiperbola tu.

Kelimpah ari nya mega, hiperbola mega bisi dipeda ba genteran tu;

Kati dik nemu nya landak ka mumpung tuak sari semalam

Ba ditu, kitai nemu mega tiap iti genteran nya ngembuan hiperbola ke diri empu. Dini kitai kala  mumpung ai tuak. Nya meh ke meri reti ngagai hiperbola ba genteran tu. Kitai semua nemu mega semina mensia ke aja nemu mumpung ai tuak. Ukai nya aja, ba ditu iya meri watak landak nyadi watak mensia ke madahka sida iya ngambiska tuak nya sari semalam. Watak mensia nya di lebih lebih ka agi ngagai watak landak awak ke iya nyadi watak ke bisi banding lalu meri reti ke lebih – lebih ngagai watak nya.

            Ba nguse leka main tu mega, aku bisi mega deka nguse pengaya leka jaku simbolik. Simbolik tu siti ari pengaya leka jaku ke meri imej siti – siti utai nya dikena meri lambang tauka kelai. Ambika chunto iya baka ba genteran tua;

                        Pama nya orang indu ngumbai diri tau berita

Ngintu tekura pedis pala sakit lengan

Buang indu bantang ngumbai diri nemu nimang lalu beramban

Ba genteran tu kitai tau nemu iya meri simbolik ngagai orang indu ngena nama jelu. Baka ba genteran keterubah nya, pama nya orang indu ngumbai diri tau berita ngintu tekura pedis pala sakit lengan. Ba ditu iya meri lambang tauka kelai ngagai orang indu tin emu berita sereta nemu berubat ngintu orang laki ke sakit tauka orang bukai ke enda gerai. Pia mega ba genteran ke tiga nya madahka baung indu bantang ngumbai diri nemu nimang lalu beramban. Ba ditu iya meri kelai ngagai sida ke indu tin emu ngereja pengawa sebaka enggau orang laki lalu watak baung ditu mai simbolik ngagai orang indu ke ulih bediri sama tinggi lalu duduk sama baruh enggau orang laki. Nya meh reti genteran ke deka dikenataika orang ke bepantun nya.

Kesimpul iya, ba pantun tu semina leka main dikena beperindang aja. kebuah iya semina nyadi ba pengidup iya ke bepantun nya empu.

Jurai senentang penteba, konsep enggau funsyen litaricha sereta leka main dalam konteks penyerakup raban bansa Iban

1

1. Pengelala senentang litaricha.

Bisi beberapa iti konsep litaricha Iban ti enda tau enda ditemu bala pengajar tauka nembiak ti belajarka jaku Iban. Dalam kereja kus tu konsep ke deka dikenang iya nya konsep litaricha lama, klasik tauka litaricha oral. Sepengudah nya kitai betelansat ngagai reti konsep litaricha tradesyenal enggau litaricha moden.

Leka jaku ‘litaricha’ nitihka penemu Lady Murasaki, iya madahka bakatu;

The storyteller’s own experience of people and of things – not only what he has passed through himself, but even something that the has only heard about – has moved the writer to an emotion so passionate that he can no longer keep it shut up in his heart. Again and again something in his own life or in the life around him seems so important that he cannot bear to let it pass into oblivion. There must never come a time, he feels, when people do not know about this.

Iya madahka, litaricha nya siti ari peneleba orang becherita ukai semina ari iya empu tang iya ninga ari orang bukai.

Nitihka bub, Sylvan Barnet e.t, 2008;

First, the word ‘literature’ can be used to refer to anything written. ana n

bepantun nya empu.a main dikena beperindang aja. kebuah iya semina nyadi ba pengidup e ulih bediri sama tinggi lalu du

Reti iya, litaricha nya madahka nama utai ke ditulis ba atas bup.

Konsep litaricha.

Bisi beberapa iti konsep litaricha Iban ti enda tau enda ditemu bala pengajar tauka nembiak ti belajarka jaku Iban. Dalam kereja kus tu konsep ke deka dikenang iya nya konsep litaricha lama, klasik tauka litaricha oral. Sepengudah nya kitai betelansat ngagai reti konsep litaricha tradesyenal enggau litaricha moden.

Leka jaku ‘litaricha’ datai ari leka jaku English ti dikumbai literature tang reti literature tu besai amat bungkur iya laban nyengkaum semua bansa karang mensia dalam dunya tu. Nitihka penemu Chris Baldick(1981:124) iya nya a body of written works related by subject-matter. Reti nya, nama aja bansa karang iya tau dikumbai litaricha. Kamus Inggeris-Melayu Dewan ba tahun 2002 meri difinisyen ti lebih kurang sebaka enggau difinisyen ti kedua, iya nya creative writings. Creative writing reti nya sebarang karang kreatif pasal sesebengkah pekara sekalika karang dalam novel, cherpan, drama, leka main enggau ti bukai agi. Ba reti kedua tu nyemetak agi pasal  leka jaku literature laban bungkur reti iya lebih komprehensif ngagai pengawa nengkebang ngena leja jaku.

Nitihka ba bup Litaricha Iban Chemeline Usop, Hasim Awang(1985) madahka litaricha tu kereban ti diasilka ari karang sastera- nya iya dikumbai kesausasteraan. Dalam bup nya mega, dalam jaku Melayu madahka sastera tu datai ari leka jaku Sanskrit ti disebut castra, reti nya bup. Kitai Iban nadai leka jaku kesusasteraan nya alai kitai minjau ari jaku English iya nya literature, tang taja pia konsep penemu asal enggau penemu senentang asik karang nya sebaka enggau konsep asal karang kesusasteraan. Ba penemu orang ke ngarang karang nya, litaricha Iban iya semua asil ‘seni’ ti dikenataika tauka ditulis ngena jaku Iban lalu ukai ngena jaku bukai.

Konsep litaricha oral

Sebedau litaricha betulis(bechelak) tu ada menya, endang iya udah bisi litaricha tang maya nya semina litaricha lisan/oral. Litaricha lisan tu mih litaricha ti ditengkebang lalu ditusi orang siku ngagai orang bukai lalu orang ti nusi cherita ngagai orang bukai di menua bukai tauka ba sebarang alai enggau ba sebarang maya(Chemeline Osup, 2011). Nya alai litaricha Iisan nadai orang ke ngarang tauka orang ken gaga iya. Kebuah pia bagi semua orang ke nerima sesebengkah cherita ngagai orang bukai di menua bukai lalu sida iya ke nusi cherita nya tau nambahka ngurangka jalai cherita nya nitihka peneka ati sida. Nya semua bepanggai ba pengelandik siku – siku orang nya betusika cherita nya. Nya alai litaricha lisan beguna bendar ke daya pengingat orang ke becherita dikena iya nyadung litaricha nya ari siti generasyen ngagai siti generasyen. Ngena jaku ke muntang litaricha lisan nya meh dikumbai litaricha kitai Iban ke paling tuai sebedau semua litaricha ke ditusi nya dichelak tauka ditulis ba dalam bup.

Konsep litaricha tradesyenal.

Litaricha tradesyenal ba bup Chemeline Osup(2011) madahka litaricha tradesyenal tu tusah tauka mar amat dipejuraika. Kebuah pia laban kitai nyau beratika konsep bukai ti besangkut paut enggau tradesyenal. Pia mega litaricha tradesyenal tu mega disebut litaricha klasik enggau lama. Ba bup Chemeline tu, litaricha lama nya mai reti having existed for a long time iya nya nitihka Kamus Inggeris – Melayu(2001). Iya nya udah tuai. Nya alai litaricha lama nya mih litaricha ti udah tuai tang utai ti lama ngembuan sifat ti Sentara laban pekara ti baru tau datai lalu udah nya iya tau nyadi lama laban ke baru bisi datai baru. Pia mega utai ke lama mudah amat enda dikingatka kitai lebuh bisi utai baru nganti iya datai.

Litaricha klasik nya gaya tauka standard ti enda berubah. Ngena jaku ke siti, iya bisi nilai kediri empu ti enda berubah tajapan timpuh enggau jeman berubah tu nitihka penemu Siti Hajar enggau Kamarudin Haji Husin, 1999.  Ba reti leka jaku ke bukai mega litaricha klasik enggau litaricha lama tu nyau deka sebaka laban ti ngembuan sifat, tradisi enggau pentenba lama sechara turun – temurun lalu enda berubah reti iya. Pandak jaku, litaricha klasik enggau litaricha lama nya meh dikumbai litaricha tradesyenal.

Konsep litaricha moden.

Bida mega ba litaricha moden. Konsep litaricha tu mega bisi mar mimit diperetika laban bisi berkaul engau timpuh sereta penteba litaricha ti diasilka maya nya kitai tau ngumbai iya litaricha moden. Richard Ellman enggau Charles Fiedelson dalam bub seduai iya The modern traditions; Backgrounds of Modern Literature madahka modenisme lebih ngemeratka pola tauka paten ti dikembuan litaricha nya. Reti nya, litaricha nya “bebas” ari kovensyen tauka leman (nyengkaum sikap) ti sama. Penemu (Yahya Ismail, 1976:2 – 3), madahka leka main ke ngayanka konvensyen nya chara pengarang bepikir enggau runding ti baru ti dibantaika sida dalam litaricha nya. Pia mega penteba enggau tukuh leka main dipeda gaya penteba tukuh litaricha nya empu. Semua penemu tu di ambi ari bup Chemeline Osup, 2011. Ambika chunto iya baka dindang kitai bansa Iban udah dipeda jauh nyimpang sereta nyelai ari bansa leka main ti bukai ketegal iya ditengkebang empat baris, chunto iya tau dipeda ba bup Janang Ensiring lebuh iya ngarang dindang Ngelar Menua Sarawak. Maya Janang Ensiring ngaga dindang tu suba, taun nya mega penyerara leka main tradisyenal enggau leka main moden iya nya ba taun 1967. Ambika chunto mega, ngelama tu litaricha kitai Iban nadai kala bisi sajak, syair tauka pantun bansa enggau Melayu, tang Janang Ensiring udah ngarang leka main Dunya tu Panggau Pengelulu ba taun 2010. Taja pia, litaricha moden , karya kitai Iban udah ngembuan sifat ti baru, iya nya bepelasarka gaya pengidup ti bendar, situasyen ti amat. Konteks ti nyemetak tauka peristiwa ke bendar enggau mensia ti bendar lebuh cherita nya ditulis tauka dikarang. Pia mega latar enggau timpuh iya mega agi ba dunya nyata. Pengarang ba litaricha tu mega nyau bekenangka pasal patriotisme, propaganda, politik pengawa nipu enggau makai suap sereta pengawa ke bukai agi.

Penteba Litaricha Tradisyenal

            Litaricha tradisyenal mega tau dikumbai litaricha klasik tauka litaricha lama. Litaricha tradisiyenal tu ngembuan pentaba kediri empu. Litaricha tradisyenal dikerembaika ngena chara lisan lalu iya tau ditambah tauka dikurangka isi enggau jalai cherita. Tu mih sekeda sifat litaricha lisan ti ngasuh iya nadai benama pengarang. Litaricha klasik iya nya gaya tauka standard ti enda berubah. Ngena leka jaku ti bukai,iya bisi nilai kediri empu ti enda berubah taja pan tipuh enggau jeman berubah. Kebuah pia laban iya ti dikerimbaika ngena chara lisan menya enda ulih diubah kitai diatu,litaricha ti nadai benama menya enda ulih diubah kitai diatu lalu pia mega  penteba ti endang enggi litaricha lama pan enda ulih diubah kitai diatu. Berindik ari nya,sastera klasik ngembuan sifat,tradisi, enggau penteba lama sechara turun-temurun lalu enda berubah.

Litaricha tradisyenal bisi ngembuan tema,penyedang gaya,penemban, enggau struktur ti tentu. Karya litaricha tradisional endang aris tradisi enggau daya idup Iban,berengkah ari asal penatai utai,jerita jelu,jerita antu,mitos,lagenda enggau jerita ngasuh ketawa. Sekeda litaricha tu dianggap kudus laban dikena ngagauka Petara kitai dalam  ritual ti dipejalaika lebuh maya gawai baka leka main kategori invokasyen. Litaricha tradisyenal bisi ngembuan leka main pemerindang enggau leka main adat.. Leka main pemerindang endang iya meruan dikesuh ngelama tu lebuh maya eka beperindang enggau pangan diri lalu leka main adat basa mayuh dikena lebuh nyambut tauka nempara temuai ti datai ngagai rumah panjai maya bisi pengerami tauka gawai.

Penteba Litaricha Moden

            Litaricha moden bisi besangkut enggau timpuh sereta penteba litaricha ti diasilka maya nya. Richard Ellman enggau Charles Fiedelson dalam bup seduai iya The Modern Tradisional ;Backgrounds of Modern Literature madahka modenisme lebih ngemeratka pola tauka paten ti dikembuan litaricha nya. Reti nya, litaricha nya “bebas” ari konvensyen tauka leman ti lama. Penteba litaricha moden ulih dipeda sekalika litaricha nya nyengala nyelai sereta limpang ari konvensyen(gaya) karang ti lama.Chunto iya,dalam genre leka main, dindang Iban udah ada lalu iya udah dipeda jaun nyimpang sereta nyelai ari bansa leka main ti bukai ketegal iya ditengkebang empat baris baka ti diasilka Janang Ensiring dalam bup iya Ngelar Menua Sarawak.

            Dalam litaricha moden,karya kitai Iban udah ngembuan sifat ti baru,iya nya bepelasarka gaya pengidup ti bendar,tempat ti bendar,situasyen ti bendar,kontek ti bendar,peristiwa ti bendar enggau mensia ti bendar lebuh cherita nya ditulis. Latar timpuh enggau tempat endang ba dunya nyata. Litaricha moden begunaka kreativiti pengarang enggau peneleba sida pasal pekara enggau peristiwa ti didinga enggau dipeda sida. Lebuh sida mantaika karang tu,endang bisi mesej ti enda nyengala ti deka dikenataika ngena chara kelaung,neresa gaya sindir,alegori,sempama,symbol enggau ti bukai. Litaricha moden tu besifat didaktif,iya nya maya ngenataika  lalau pendiau enggau ajar dikena ngemenyanaka mensia. Novel,cherpan,drama enggau leka main bela ngundan ukur pendiau ti ulih diambi ke teladan enggau ke tenggau kitai ba dunya tu.

Fungsyen litaricha dikena nyerakupka raban bansa.

Ba litaricha bansa kitai Iban mayuh amat fungsyen ke manah dikena nyadika peransang lalu napi nyerakupka raban bansa. Keterubah iya, litaricha kitai Iban endang ngemeratka pengelantang enggau pengelikun raban bansa, nadai ngemediska ati orang sereta nadai bejai sapa – sapa maya orang bukai ke macha litaricha kitai Iban. Rindu amat maya macha litaricha kitai sekalika iya nguna watak mensia, antu, ikan tauka burung. Kebuah pia laban litaricha menya endang bekonsepka pemerindang dikena ngelantangka ati tang ukai dikena ngemuaska ati diri aja. ambika chunto sema meh litaricha nya litaricha lisan, ba litaricha nya mayuh amat bekeknangka rampa menua ke manah lalu bekaul enggau daya idup kitai Iban empu. Watak ke dipilih mega semina dikena ngerembaika jalai jerita lalu dikena ngemanahka cherita. Watak ke dipilih mega selalu ngembuan pengelebih tauka pengurang iya empu. Watak ke kering selalu amat dipadahka menang dikena ngelaban watak ke lemi tuju iya dikena ngayanka pemendar enggau reality idup kitai Iban. Baka cherita Apai Saloi, tajapan cherita iya selalu ditusi kitai siku watak apai tuai orang ke beli sereta mapap tang ba dia kitai tau bulih ajar sereta penemu baru dikena kitai ngubah pengidup kitai empu.

Kedua, litaricha kitai Iban mega bisi ngembuan alegori tauka sema banding awak ke nyadi teladan, chuan, malin, peduman, pesan, mesej, ajar, lalau enggau jaku tangkan bala pengarang nagagai bala mayuh sereta pemacha ngambi sida iya belajar ari peneleba enggau pemaik dalam litaricha lalu nyadi mensia ti menyana. Nya alai fungsyen litaricha kitai Iban nya dikena ngedang pengidup kitai awak ke bisi kualiti tauka pemanah lalu tak enda idup ngapa baka selama. Ambika chunto baka cherita Kelemayang Pengerindu, ditulis Johnny Chuat ba taun 2011. Dalam cherita nya mayuh amat bekenangka pengidup raban bansa Iban ba rumah panjai lalu agi begunaka daya idup sereta adat ke suba. pia mega dalam cherita nya madahka pegidup siku – siku mensia ke negmbuan juluk ati sereta pemai ati ke  meruan. Dalam cherita nya mega bisi ngembuan ajar ke manah baka anang jai enggau orang, sereta anang ngasaka ati oaring enggau mayuh agi plot ke manah ba dalam bup nya.

Tajapan fungsyen litaricha kitai Iban ngembuan fungsyen ke besai bendar iya nya merindang kitai tang iya agi bisi konsep ngajar. Nya kebuah pengidup kitai bisi begulai sejalai, pengelurus runding, pengawa ngerupan, enggau beduruk sereta pengawa ke agi bekabih enggau nya, ari nya tadi kitai nemu kitai Iban dikarapka enda bangat tak kelalu berundingka diri aja dalam pengidup begulai enggau pangan diri tauka enggau raban bansa bukai.  Enti litaricha kitai Iban nya manah iya tau nyadika pengelala tauka identity kitai bansa Iban lalu mega enda tinggal iya ngayanka penulin bansa kitai. Nya alai pengarang ke ngarang siti – siti jerita nya diasuh nangkanka jaku pesan lalu jaku nepuka jaku ajar dalam jerita ke dikarang nya.

Pia mega, litaricha kitai Iban mega ngenataika lalau pendiau enggau ajar dikena ngemenyanakan mensia. Semua mesej tauka pesan ke dikenataika bala sida karang, novel tauka cherpan nya bela bisi ngundan tukur pendiau tu ulih diambi kitai ke teladan enggau ke tenggau kitai ba dunya tu ngambika sida ke buta moral tauka sida ke macha nya tau berubah lalu tau enchelak ngujungka sida iya nyadi manah. Pemanah utai ke dikenataika sida pengarang ba novel, karang, cherpan tauka ba leka main nya endang ngembuan tuju ke nemba sereta iya mungkur semua tukur pengidup kitai mensia ke macha nya, kebuah pia dalam leka main tauka novel nya bisi gak bisi ngembuan reti ke belalai sereta ke bekarung nya meh siti jalai dikena meri pemanah ba jerita ke digaga kitai nya. Nya meh meri ajar ngagai kitai awak ke ruang bilik kitai enda pecha, nagang kitai ngirup nyak kelalu, anang makai dadah ke ngerusak nyawa, lalu bisi meransang kitai nyadi mensia ke ransing gawa lalu enda ngelusu maya gawa awak ka idup kitai tau meruan. Nya ke ngembua ajar manah lalu iya ulih napi sereta ngeyadika penyerakup raban bansa nengah litaricha kitai Iban .

Simpul penemu.

Ba jurai senentang konsep, penteba enggau fungsyen litaricha Iban tadi kitai tau nemu kitai bansa Iban mega endang siti ari bansa ke bisi ngembuan tukuh sereta bisi ngeluarka mayuh macham bansa litaricha sebaka enggau bansa bukai ke bisi ngaga litaricha sida iya ke diri empu. Ba litaricha nya meh kitai mantai ke pemanah daya idup kitai, chara kitai idup sereta adat kitai Iban. pia mega bakani litaricha oral/lisan nya tau nyadika litaricha klasik laban penteba enggau tradisi iya agi sama lalu ngembuan tukuh ke agi bekabih. Pia mega, litaricha tradesyenal mega siti litaricha lama, kebuah pia iya agi bekaul enggau litaricha lama enggau klasik. Litaricha moden nya siti ari litaricha ke baru lalu iya ditengkebang bala sida ken emu agi baka sida Janang Ensiring enggau mayuh agi pengarang bup ke pandai lalu betuliska bup pasal utai baru lalu nya ke  ngasuh bisi bida antara litaricha tradesyenal enggau moden. Fungsyen litaricha mega endang entap ba litaricha kitai Iban, kebuah pia mayuh litaricha kitai Iban ngembuan jaku ajar, peduman ke ulih ngasuh orang nemu daya idup sereta pemnah idup kitai. Udah nya, litaricha kitai enda negu pasal pengarap enggau bansa orang bukai ke ngasuh orang pedis ati sereta begedi, pia mega litaricha kitai Iban enda nyindir sereta meri jaku jai ngagai orang,

1.    Kereban sanding.

Bup sereba reti.(2011). Tun Jugah Foundation. Kuching.

Casper Kayong Umping.(2010). Raja Sengalang Burung. Sarawak Iban Writers Association.

Sibu.

Chemeline Osup.(2011). Litaricha Iban. Pegari Iban Production. Bintulu.

Kamus Dewan Edisi Keempat.(2007). Dewan Bahasa dan Pustaka.

Rohana Hassan @ Norshamiah Othman.(2010). Antologi Harga Remaja @ Novel Melunas

Rindu. Penerbit Ilmu bakti Sdn. Bhd. Selangor.

Sylvan Barnet @ William E Cain.(2006). A Short Guide To Writing About Literature. Copyright

by Sylvan Barnet @ William E Cain.

Sylvan Barnet, William E Cain @ William Burto.(2008). An Introduction To Literature .Copyright

Sylvan Barnet, William E Cain, William Burto

Vinson @ Joanne Sutlive.(1994). Handy Dictionary of Iban and English. Tun Jugah Foundation.

Kuching.

http://www.moe.gov.my/bpk/pNp/jaku_iban/sistem_jaku/index.htm diakses kena 19 julai.